වාහන වායු විමෝචන භාරකාර අරමුදල සහ
ව්‍යාපෘති කාර්යාලය
වාහන වායු විමෝචන භාරකාර අරමුදල, ව්‍යවස්ථාපිත රාජ්‍ය සංවිධානයක් වන අතර, වාහන වායු විමෝචන පරීක්ෂණ වැඩසටහන අධීක්ෂණය කරනු ලබන සුවිශේෂී නියාමන අධිකාරිය ලෙස කටයුතු කරයි. මෙහි මූලික පරමාර්ථය වනුයේ ශ්‍රී ලංකාවේ වාහන වායු විමෝචන පරීක්ෂණ වැඩසටහන වැඩිදියුණු කිරීම සහ නියාමනය කිරීමයි. තවද වාහන වායු විමෝචන භාරකාර අරමුදල, රට තුළ වායු තත්ත්ව කළමනාකරණය ප්‍රවර්ධනය කිරීමේ පුරෝගාමී කාර්යභාරයක් ඉටු කරනු ලබයි. හවුල්කාර සංවිධාන සමඟ සහයෝගී ප්‍රයත්නයන් හරහා, අප අවට වාතයේ ගුණාත්මකභාවය ඉහළ නැංවීම සහ රථවාහන කළමනාකරණය ප්‍රශස්ත කිරීම අරමුණු කරගත් පර්යේෂණ සහ ව්‍යාපෘති සඳහා තීරණාත්මක සහාය සපයනු ලබයි. මෙම මෙහෙයුම් කටයුතු සඳහා නාරාහේන්පිට පිහිටි මෝටර් රථ ප්‍රවාහන දෙපාර්තමේන්තුවේ මධ්‍යම ව්‍යාපෘති කාර්යාලය මඟින් පහසුකම් සපයනු ලබයි. මෝටර් රථ සහ වාහන විමෝචනය පිළිබඳ තාක්ෂණික පුහුණුවලත් විශේෂඥයන්ගෙන් සහ පරිසර විද්‍යාව පිළිබඳ විශේෂඥ කාර්යයාල කාර්ය මණ්ඩලයකින් සැදුම්ලත් ව්‍යාපෘති කාර්යාලයකි. ඔවුන්ගේ වගකීම් මධ්‍යස්ථාන විගණනය, මාර්ග පරීක්ෂාව, පැමිණිලි කළමනාකරණය සහ දැනුවත් කිරීම් වැනි විවිධ ක්‍රියාකාරකම් වලින් සමන්විත වේ. කැබිනට් අනුමැතිය ලත් වායු සම්පත් කළමනාකරණ කේන්ද්‍රයේ මගපෙන්වීම හා උපායමාර්ගික සහ අධිකාරී ප්‍රවේශය යටතේ ව්‍යාපෘති කාර්යාලය ක්‍රියාත්මක වේ.
වාහන වායු විමෝචන භාරකාර අරමුදල 2008 සැප්තැම්බර් මස 03 දින අමාත්‍ය මණ්ඩලය තීරණ ලේඛන අංක අම්ප /08/1514/354/054 යටතේ අනුමත කර පිහිටුවන ලදී. මෙම වැඩසටහනේ ප්‍රධාන අරමුණ වූයේ භාණ්ඩාගාරයට බරක් නොවී වාහන වායු විමෝචන වැඩසටහන සඳහා පහසුකම් සැලසීමයි. විමෝචන පරීක්ෂණ සමාගම් පරීක්ෂණ ගාස්තුවෙන් 10%ක මුදලක් වාහන වායු විමෝචන භාරකාර අරමුදල වෙත බැර කරනු ලබයි. වාහන වායු විමෝචන වැඩසටහන ක්‍රියාත්මක කිරීම හා සම්බන්ධ සියලුම රජයේ වියදම් ආවරණය කිරීම සඳහා වාහන වායු විමෝචන භාරකාර අරමුදල බැඳි සිටිනු ලබයි. වාහන වායු විමෝචන භාරකාර අරමුදල පාලනය වනුයේ භාරකාර ගිවිසුමකින් වන අතර එය භාණ්ඩාගාරයේ ලේකම් සහ භාරකාර මණ්ඩලය විසින් අත්සන් කරනු ලැබේ. භාරකාර ගිවිසුම සඳහා පුද්ගලයන් පස් දෙනෙකු භාරකරුවන් ලෙස කටයුතු කරනු ලබයි. ශ්‍රී ලංකාවේ පරිසර වාතයේ ගුණාත්මක භාවය සහ රථවාහන කළමනාකරණය ඉහළ නැංවීම කෙරෙහි මූලික වශයෙන් අවධානය යොමු කර ඇති අතර අරමුණු හතක් භාරකාර ඔප්පුව මගින් හදුන්වා දී ඇත. වාහන විමෝචන පරීක්ෂණ ව්‍යාපෘති කාර්යාලය 2010 වසරේ මෝටර් රථ ප්‍රවාහන දෙපාර්තමේන්තුව යටතේ ස්ථාපිත කරන ලදී. වාහන වායු විමෝචන කාර්යාලය ක්‍රියාත්මක වන්නේ භාරකාර අරමුදලේ අරමුණු හත සම්පූර්ණ කිරීම සඳහා ය. වාහන වායු විමෝචන කාර්යයාලයේ මෙහෙයුම් ප්‍රධානියා ලෙස කටයුතු කරනු ලබන්නේ වාහන වායු විමෝචන වැඩසටහනේ අධ්‍යක්ෂ ජනරාල් වෙත වාර්තා කරන ව්‍යාපෘති අධ්‍යක්ෂවරයාය. මෝටර් රථ ප්‍රවාහන කොමසාරිස් ජනරාල්වරයා වාහන වායු විමෝචන වැඩසටහනේ අධ්‍යක්ෂ ජනරාල්වරයා ලෙස නිල මට්ටමින් ක්‍රියා කරනු ලබයි.
